प्रहरीमा पनि बीस वर्षे पेन्सन प्रस्ताव

द्वारा प्रकाशित गरिएको हो |
August 8th, 2022
अनुमानित पढ्ने समय : 4 मिनेट
फाईल तस्विर

काठमाडौं । छसस । नेपाल प्रहरीमा प्रहरी नियमावली, २०७१ जारी हुनु पूर्व प्रहरी नियमावली, २०४९ अनुसार प्रहरी जवान र प्रहरी हवलदार दर्जामा १६ वर्ष सेवावधि पूरा गरे पश्चात पेन्सन पाउने कानुनी व्यवस्था रहेको थियो । प्रहरी नियमावली, २०७१ जारी भएपछि उक्त नियमावलीको नियम १३१ मा संशोधन गरि पेन्सन सम्वन्धी नयाँ व्यवस्था गरियो । उक्त कानूनी व्यवस्था अनुसार २०६० चैत २६ गतेपछि नियुक्त हुने सम्पूर्ण प्रहरी कर्मचारीहरुलाई २० वर्ष अवधिसम्म प्रहरी सेवामा काम नगरी पेन्सन सुविधा नपाउने व्यवस्था गरियो । उक्त कानूनी व्यवस्थाले गर्दा तल्लो दर्जाका प्रहरी कर्मचारीहरूमा ठुलो नैराश्यता देखिन थालेको छ । जसको कारण हजारौं प्रहरी कर्मचारीहरुले पेन्सन नपाक्दै राजिनामा दिएर हिडन थालेका छन् । एक त दस वर्षसम्म बढुवा नहुने, दोस्रो तलव सुविधा कम हुने,तेस्रो दैनिक १८ घण्टा काम गर्नुपर्ने, राम्ररी सुत्न नपाउने, चौथो घर–परिवारलाई भेटन विदा नपाउने, पाँचौ प्रहरी सेवामा भन्दा वैदेशिक रोजगारमा राम्रो कमाइ हुने आदि कारणले राजीनामा दिने लहर चलेको छ । यस्तो राजिनामा रोक्न सरकारले ७ वर्ष सेवा गरेका प्रहरी जवानलाई सहायक हवलदार, प्रहरी हवलदारलाई प्रहरी वरिष्ठ हवलदार र प्रहरी नायव निरीक्षकलाई प्रहरी वरिष्ठ नायव निरीक्षकमा बढुवा गरेपनि यो पानी बढुवाबाट कोही प्रहरी पनि सन्तुष्ट छैनन । जसका कारण नेपाल सरकारलाई ठूलो आर्थिक नोक्सानी मात्र भएन, प्रहरी संगठनको काम कारवाही मै नकारात्मक असर पर्न गएको छ । त्यसै कारण नेपाल प्रहरीले अझै पनि नोक्सानी व्यहोरिरहेको छ ।
सरकारबाट विना अध्ययन हचुवामा कानून र नीति बन्दा राज्य, सरकार र संगठनलाई कस्तो असर पर्दो रहेछ भन्ने कुराको नेपाल प्रहरी एउटा उदाहरण बनेको छ । पेन्सनको अवधि २० वर्ष पुरयाएपछि उत्पदानमा जाने र भगौडाको संख्या उल्लेखनीय रूपमा बढेपछि प्रहरी कर्मचारीलाई टिकाइराख्न र जनशक्तिको व्यवस्थापन गर्न प्रहरी प्रधान कार्यालयलाई मुस्किल परेको स्रोतको दाबी छ ।
उमेरभित्रै दोस्रो वृत्ति विकास सुरू गर्न सहज हुने भएकाले सङ्गठनले प्राथमिकताका साथ अघि सारेको १६ वर्षे पेन्सनसम्बन्धी नीतिलाई सरकारले अनुमोदन गर्नु उपयुक्त हुने उच्च प्रहरी अधिकृतहरु बताउछन् । त्यसैले नेपाल प्रहरीको तल्लो दर्जाका जनशक्तिको माग सम्बोधन गर्न पेन्सन (निवृत्तिभरण) सम्बन्धी २० वर्षे हालको व्यवस्थालाई पहिले जस्तै १६ वर्षे वनाउनु पर्ने जोडदार माग रहदै आएको छ होइन भने तल्लो दर्जाको कामले धानेको नेपाल प्रहरीको कामकारवाही अझै खस्किने सुरक्षा विज्ञहरु वताउँछन् ।
पछिल्ला वर्षमा पेन्सन नै नभई सेवा छोड्ने प्रहरीको संख्या निकै बढ्दै छ । प्रहरी प्रधान कार्यालयले प्रहरी नियमावली, २०७१ मा संशोधन गरी प्रहरी जवानदेखि वरिष्ठ हवलदार दर्जासम्मको पेन्सन अवधि १६ वर्षे बनाउन सरकार समक्ष प्रस्ताव गरेको धेरै समय बिति सक्यो । सरकारले यो व्यवस्था तुरुन्तै लागु गरी प्रहरीमा तल्लो दर्जाका जनशक्ति अन्यत्र पलायन हुने अवस्थालाई रोक्नु पर्ने देखिन्छ । हाल उक्त प्रस्ताव अर्थ मन्त्रालयमा रोकिएको छ । अर्थ मन्त्रालयका अधिकारीहरूले आफ्नो घरको पैसा दिने जस्तो गरेर राय फाइल रोकेर राखेका छन् तर, रोक्नु पर्ने कुनै कारण छैन । दक्ष र तालिम प्राप्त जनशक्ति दिनहुँ राजीनामा दिन बाध्य हुनु परेको अवस्था छ । एउटा प्रहरी जवान उत्पादन गर्न राज्यको ७ लाख खर्च हुन्छ । असई र इन्स्पेक्टर उत्पादन गर्नलाई १० लाख खर्च हुन्छ । अझ अनुभवले खारिन १० वर्ष लाग्छ ।
यसबाट भइरहेको आर्थिक क्षति पनि १६ वर्षे पेन्सन अवधि वनाउँदा निकै कम पर्न जाने हुँदा आर्थिक व्ययभार हुन्छ भन्ने हचुवा र आधारहीन कुतर्क गरेर संशोधन प्रस्ताव रोक्न जरुरी नभएको स्रोत बताउछ । साँच्चै अनुसन्धान गर्ने हो भने १६ वर्षे पेन्सन अवधि बनाउनु भनेको कम लगानी गर्नु सरह हो । २०६० चैत २६ गतेपछि २० वर्षे पेन्सन अवधिले पारेको असरको तुलनामा राज्यलाई आर्थिक भार धेरै कम पर्छ । प्रस्तावित नियमावलीमा तल्लो तहका लागि दर्जागत आधारमा स्वेच्छिक अवकाशमा जान सक्ने व्यवस्था प्रस्ताव गरिएको छ । २०६० चैत २६ पछि भर्ना भएका तल्लो दर्जाको कर्मचारीको पेन्सन अवधि १६ वर्ष बनाउन प्रस्ताव गरिएको छ ।
बिस वर्ष सेवा नपुग्दै स्वेच्छिक अवकास लिने त्यस्ता प्रहरीले निवृत्तिभरणको रकम भने सेवा प्रवेश अर्थात भर्ना भएको मितिले २० वर्ष अवधि पूरा भएको मितिबाट मात्रै पाउने प्रस्ताव गरिएको छ । नियमावली संशोधन भई कार्यान्वयनमा आएपछि तल्लो तहमा जागिरमा रहनेले केही हदसम्म राहत महसुस गर्ने छन् ।
२० वर्ष अवधि पूरा भएको मितिबाट मात्रै पेन्सन पाउने नियम, नेपाली सेनामा १६ वर्षे पेन्सनको व्यवस्था लागू भएको करिब एक वर्ष पुगिसक्दा समेत नेपाल प्रहरी,सशस्त्र प्रहरी बल र राष्ट्रिय अनुसन्धान विभागमा भने लामो समयसम्म पेन्सनसम्बन्धी मुद्दा सम्बोधन नहुँदा हालसम्म हजारौं संख्यामा तल्लो तहका कर्मचारीहरुले बिचमै सेवा छाडेर हिंडेका छन् । अझै छाड्ने क्रम रोकिएको छैन । प्रहरीमा तल्लो तहको कर्मचारीको माग सम्बोधन नहुँदा अवकासपछि जीवन धान्न र परिवार पाल्न कठिन हुने जनाउँदै प्रहरीले वैदेशिक रोजगारीमा जाने सिलसिलाम बीचमै जागिर छाड्ने गरेका छन् । सेवा परित्याग गरी वैदेशिक रोजगारीमा जाने तल्लो तह सिपाहीदेखि हवलदारसम्मको संख्या अधिक छ । सोह्र वर्षसम्म सेवा गरेको जनशक्ति पनि पेन्सन नभई जागिर छाडेको आंकडाले देखाएको छ । पेन्सनको अवधि २० वर्ष पुरयाएपछि उपदानमा जाने र भगौडाको संख्या उल्लेखनीय रूपमा बढेपछि प्रहरी कर्मचारीलाई टिकाइराख्न र जनशक्तिको व्यवस्थापन गर्न प्रहरी प्रधान कार्यालयलाई मुस्किल परेको देखिन्छ ।
उमेरभित्रै दोस्रो वृत्ति विकास सुरू गर्न सहज हुने भएकाले सङ्गठनले प्राथमिकताका साथ अघि सारेको १६ वर्षे पेन्सनसम्बन्धी नीतिलाई सरकारले अनुमोदन गर्नु उपयुक्त हुने प्रहरी अधिकृतहरु बताउछन् । तल्लो दर्जाको कर्मचारीले १६ वर्ष सेवा गर्दा उसको उमेर करिव ३५ को हाराहारीमा पुगेको हुन्छ । वैदेशिक रोजगारीको लागि ३५–४० उपयुक्त समय भएकोले वैदेशिक रोजगारीको लागि १६ वर्षमा पेन्सनमा अवकाश जान चाहन्छन् । थोरै तलव भत्ताका कारण प्रहरी कर्मचारीलाई परिवार पाल्न र सन्ततिलाई शिक्षा दिन र स्वास्थ्य उपचारको लागि पर्याप्त रकम नहुने हुँदा समेत विकल्प खोज्नुपर्ने बाध्यता रहेको छ ।
प्रहरीमा निकै शारीरिक परिश्रम गर्नुपर्ने तल्लो दर्जाका प्रहरी परिवारलाई स्वास्थ्य, शिक्षा, तालिम, आवास, बीमा र रोजगारका क्षेत्रमा सरकारले थप प्रोत्साहनका सेवा सुविधा उपलब्ध गराउन सकेको छैन, त्यसैले यी सुविधा आवश्यक रहेको छ ।
तालिम प्राप्त, अनुभवी, क्षमतावाहन र अनुशासित जनशक्ति बाहिर जाँदा विप्रेषणको माध्यमबाट मुलुकलाई समेत ठूलो योगदान पुग्ने हुँदा उठिरहेको पेन्सनको कुरा राज्यले सुनिदिंदा राम्रो सन्देश प्रवाह हुने तल्ला प्रहरी कर्मचारीहरूको आवाज छ । नेपाली सेनामा जस्तै प्रहरीमा पनि १६ वर्षे पेन्सन अवधि लागू गरी ठूलो संख्यामा रहेका प्रहरी कर्मचारीको आवाज राज्यले सुनिदिनु पर्छ भन्ने कुरा उठिरहेको छ ।

प्रतिक्रिया दिनुहोस

सम्बन्धित समाचार