लोकतन्त्रको खिल्ली उडाइदैछ

द्वारा प्रकाशित गरिएको हो |
March 30th, 2021
अनुमानित पढ्ने समय : 3 मिनेट
फाईल तस्विर

काठमाडौं । छसस । मुलुकमा जताहे¥यो त्यतै लथालिंगको अवस्था छ, अव्यवस्थित र भाँडभैलो छ । राजनैतिक, आर्थिक, सामाजिक अवस्था मात्र होइन, विकासको क्रम पनि त्यतिकै डामाडोल छ । गरिब, निमुखाको घर दैलोमा लोकतन्त्रको घाम अझै झुल्केको छैन । यी सब हुनुमा डनवाद, फरियावाद, भ्रष्टतन्त्र कारक बनेको छ ।
मुलुकमा विभेदको नीति कहिल्यै नआओस्, विभेदरहित ढंगले नेपाली जनता रमाउन, भ्रष्ट, घुसखोरी, अहंकारीहरुका शीर निहुरियोस्, साम्प्रदायिक सद्भाव माथि कहि कतैबाट खलल हुने काम नहोस्, अग्राधिकार आत्मनिर्णयको अधिकार समावेशी र पूर्ण समानुपातिक व्यवस्थाका साथै जातीय भाषीक र क्षेत्रीय स्वशासनको आधारमा राज्यको पूर्नसंरचना, पहिचान सहितको संघीय लोकतान्त्रिक गणतन्त्रको स्थापना मुलुकले चाहेको थियो । तर, यी यस्ता सवालहरुलाई संविधान निर्माण क्रममा बेवास्ता गरिए । फलस्वरुप संविधान संशोधनका सवालहरु मुलुकव्यापी रुपमा उठिरहेका छन् । लोकतान्त्रिक संविधान निर्माण पश्चात पनि, मुलुकले संविधान संशोधनको सवाल उठाउन बाध्य हुनुपरेको अवस्था छ । मधेश, पहाड, तराई, सर्वत्र संविधान संशोधनको पक्षमा जुरुक्कैउठिरहेको छ ।
यसरी एकातर्फ संविधान निर्माण क्रममा जनभावनालाई कदर गरिएन भने अर्काे तर्फ राजनैतिक दलहरुले गणतन्त्रको नाममा पंचायती ढर्रामानै, फरियावाद, डनवाद जस्ता शैलीलाई नै अंगीकार गर्दै अगाडि बढिरहेका छन् । यहाँ सम्मकी समानुपातिक प्रणालीबाट जितेका कोटामा समेत नातावाद, फरियावादलाई नै अवलम्वन गर्दै पंचायती शैलीलाई माथ गराउने काम गरिरहेका छन् ।
सबै राजनैतिक दलहरुले समावेशीको अवसर विविध जाति, जनजाति, दलित, उत्पीडित समुदायलार्य नभई समावेशीको नाममा उनीहरुले आफ्ना जातभाई, श्रीमती, भतिज, साला, साली, सम्धी, सम्धीनी भर्ती गर्ने अखडा बनाउँदै आएका छन् । दलहरुले समावेशीको आधारमा नियुक्ति गरेका चेहराहरु हेरे यसको पुष्टि हुनेनै छ । यसक्रममा प्रचण्ड होस् या ओली, देउवा होस् या राप्रपाकै कमल थापा नै किन नहोस्, सबै तछाँड मँछाड छन् । एक इन्चको पनि फरक छैन यिनीहरुमा ।
सबै राजनैतिक दल र नेताहरुले यसरी देश र जनहितलाई वेवास्ता गर्दै, लोकतन्त्रलाई ओझेलमा पार्ने काम गरिरहेका छन् । नेपालका राजनैतिक दलका नेताहरुमा आफ्ना व्यक्तिगत स्वार्थ पुरा गर्ने चिन्तन बाहेक राष्ट्र र जनताका सवालमा कुनै राम्रो ध्यान पुगेको देखिएन । यी राजनैतिक दल र त्यसका शिर्षस्थ नेताहरुले निहित स्वार्थ पुरा हुने अवस्थामा राष्ट्रको अस्तित्वनै समाप्त हुने जस्ता काम गर्न पनि पछि पर्दैनन् भन्ने छनक नेपाली जनताले नपाएका होइनन् । जसले गर्दा परापूर्वकालदेखि एक आपसमा एउटै परिवार जस्तो गरी मिलेर बस्दै आएका नेपाली जनताको मन कुँडिन थालेको अवस्था छ । साम्प्रदायिक सद्भाव तथा सहिष्णुता खलबलिएको छ । एउटा जाति, भाषा, धर्म, संस्कृति र क्षेत्रको निषेधमा मुक्ति देखिरहेको छ ।
देशमा संविधान विधिको शासन तथा प्रशासन केही नभएको जस्तो छ । जताततै अराजकता छ । जनताको सुरक्षा छैन । भ्रष्टाचारको साम्राज्य मौलाएको छ । महँगीले जनताका आधारभुत आवश्यकता पुरा गर्ने अधिकार समेत कुण्ठित भएका छन् । सारमा भन्दा आन्तरिक र बाज्यु कारणले नेपालको राष्ट्रिय अखण्डता, सार्वभौमिकता र राष्ट्रिय सुरक्षा ज्यादै ठूलो खतरामा परेको छ । पछिल्लो जनमतका आधारमा देशमा ठूला दल बन्न पुगेका दलका नेताहरुले गरेका गलत सहमति, सम्झौता र सत्ता प्राप्तिका लागि खेलिएका अवाञ्छित खेलहरुले देशभित्र बढेको चरम भ्रष्टाचार र महँगीले सर्वसाधारण जनतालाई सामान्य जीवन बाँच्न पनि धेरै गाह्रो भएको छ । पद र पैसाका लागि अहिले नेपालमा देशको संस्कार, संस्कृति, र मर्यादा बेचिदै छ, सरकारी, गैह्रसरकारी, शैक्षिक र बीत्तिय सेवाका पदहरु बेचिदैछन् । एउटै वाक्यमा भन्दा राष्ट्रिय अस्मिता नै बेचिदै छ । सबै क्षेत्रका पदहरु लाखौदेखि करोडौंमा लिलाम बढाबढमा बिक्रि हुँदा, सर्वसाधारण जनताका छोराछोरीहरु योग्य हुँदाहुँदै पनि मोटो रकम घुस दिन नसकेको कारणले कुनै पनि क्षेत्रको सेवामा प्रवेश गर्न पाएका छैनन् । कर्मचारीहरुको सरुवा र बढुवामा समेत लाखौ घुस लेनदेन हुँदा भ्रष्टाचार खुलेआम संस्थागत भएको छ । ठूला राजनीतिक दलका नेता र कार्यकता विशेष गरेर सत्तारुढ दलका मानिसहरु यति भ्रष्ट भएका छन् कि जसको बयान गरेर साध्य छैन ।
आज नेपालमा राजनीतिक, प्रशासनिक, शैषिक र सामाजिक क्षेत्र यति विषाक्त भएको छ कि, यसको सामान्य उपायद्वारा सुधार गर्न सम्भव नै छैन । त्यसकारण सबै क्षेत्रमा आमूल परिवर्तन ल्याउन सम्पूर्ण क्रान्तिको आवश्यकता छ । नेपालको आकाशमाथि मडारिएको कालो बादललाई हटाई विदेशी हस्तक्षेपमुक्त एउटा स्वतन्त्र, सार्वभौमसत्तासम्पन्न, आत्मनिर्भर, स्वाभिमानी तथा शक्तिशाली राष्ट्र निर्माण गर्न आजैबाट सतर्क रहनुपर्ने देखिन्छ ।

प्रतिक्रिया दिनुहोस

सम्बन्धित समाचार