अचम्मको सिफारिस

द्वारा प्रकाशित गरिएको हो |
March 22nd, 2021
अनुमानित पढ्ने समय : < 1 मिनेट
फाईल तस्विर

काठमाडौं । छसस । सतिले सरापेको मुलुकमा पुरस्कृत हुने व्यक्ति दण्डित र दण्डित हुनुपर्ने व्यक्ति पुरस्कृत हुँदै आएका छन् । भर्खरै मात्र पनि जनअदालतले दोषी ठहर गरेका व्यक्तिलाई सरकारले पुरस्कृत गरेर उक्त कुराको थप पुष्टि गरेको छ । अख्तियार दुरुपयोग अनुसन्धान आयोगबाट समेत कार्वाहीको सिफारिसमा परेका एक न्यायधीश अर्जुन प्रसाद कोइराला जिल्ला न्यायधीशबाट उच्च अदालतको न्यायधीशमा सिफारिस भएका छन् । सिद्धबाबा बलात्कार प्रकरणमा विवादास्पद फैसला गरेका भनिएका न्यायधीश कोइरालालाई न्याय परिषदले उच्च अदालत जनकपुरमा सिफारिस गरेपछि दुनियाँ तीन छक्क परेका छन् । स्मरणीय छ, सिद्धबाबा भनिने कृष्णबहादुर गिरी विरुद्धको बलात्कार मुद्दामा जिल्ला न्यायधीश कोइरालाले दिएको फैसलाको सर्वत्र विरोध भएको सर्वविदितै छ । सिद्धबाबाले निज महिलासँग सम्बन्ध कायम गरेपनि त्यो बलात्कार नभई महिलाले नै मोहित भएर आफ्नो सम्पूर्ण शरीर समर्पण गरेको भन्दै जिल्ला न्यायधीश कोइरालाले सिद्धबाबालाई सफाइ दिने काम गरेका थिए । यतिमात्र नभएर निज न्यायधीश अर्जुन प्रसाद कोइराला यसअघि पनि सरकारी जग्गा हिनामिना प्रकरणमा सप्रमाण मुछिएका थिए । नक्कली कागजपत्रका आधारमा अदालतमा मुद्दा दर्ता गरी सरकारी जग्गा व्यक्तिको नाममा दर्ता गर्न कोइरालाले सघाएको अख्तियारको छानबिनपछि खुलेको थियो । र अख्तियारले त्यतिबेलै उनलाई कार्वाही गर्न समेत सिफारिस गरिसकेको थियो । यसरी दण्डित हुनुपर्ने व्यक्तिलाई पुरस्कृत गरेर न्यायमूर्तिहरुले के गर्न खोजेका हुन् अचम्मकै विषय बनेको छ ।

प्रतिक्रिया दिनुहोस

सम्बन्धित समाचार