इट्टाको जवाफ पत्थरले दिने

द्वारा प्रकाशित गरिएको हो |
November 23rd, 2020
अनुमानित पढ्ने समय : 2 मिनेट
फाईल तस्विर

काठमाडौं । छसस । नेकपाद्वय अध्यक्ष बीचको फरक फरक राजनैतिक प्रस्तावको कारण पार्टी फुटको संघारमा पुगेपछि सम्भावित दुर्घटनालाई निष्तेज पार्न विकल्पको खोजीमा दोडधुप चलिरहेको छ । फलस्वरुप १० दिनसम्म बैठक पछि सारेर प्रधानमन्त्री ओली र कार्यकारी अध्यक्ष प्रचण्ड समुह एकले अर्काेलाई कसरी पछार्न सकिन्छ भन्ने कुरामा तानाबाना बुन्न तल्लिन देखिन्छन् ।
अनेकौं आशंका र अविश्वासको बाबजुद संसदवादी नेकपा एमाले र अर्ध संसदवादी माओवादी केन्द्रबीच पार्टी एकता भएकै दिन छहराले एमाले र माओवादीबीचको अप्राकृतिक एकता लामो समयसम्म टिक्न नसक्ने भविष्यवाणी गरेको थियो । आखिर छहराको यो भविष्यवाणी नेकपामा देखिएको अहिलेको परिदृष्यले सत्यतातर्फ उन्मुख हुँदै गइरहेको छ ।
अध्यक्ष प्रचण्डको तर्फबाट प्रस्तुत राजनैतिक प्रस्तावमाथि प्रहार स्वरुप प्रधानमन्त्रि ओलीको तर्फबाट प्रस्तुत हुने फरक राजनीतिक प्रस्तावको कारण पार्टी फुटको संघारमा पुग्ने सम्भावित खतरालाई टार्न यति बेला नेकपाभित्र दौडधुप चलिरहेको देखिन्छ । अहिले पार्टीका प्राय नेता तथा कार्यकर्ताहरु पार्टी विभाजन विरुद्ध देखिएका छन् । पार्टी पंक्तिको यो भावनालाई कदर गर्न अध्यक्षद्वयलाई कार्यकर्ताहरुको दबाब रहेको छ । दोस्रो तहका नेता तथा कार्यकर्ताका पार्टी विभाजनविरुद्धको यो भावनालाई कदर गर्न अध्यक्षद्वय समक्ष दोस्रो तहका नेताहरुले प्रस्ताव राखेका छन् । विगतमा बहुमतको सरकार गठन गर्न अध्यक्षद्वय ओली र प्रचण्डले पार्टी एकतालाई अप्राकृतिक रुपमा एकीकरण गर्न सफल भएपनि आखिर भागबण्डाको रडाकोको कारण हाली एकीकरणमा धाँजो फाट्ने काम भइरहेको छ । अझै पूर्ण रुपमा जनवर्गीय संगठन लगायत स्थानीय तहहरुमा चित्तबुझ्दो रुपमा एकीकरण हुन सकिरहेको छैन । प्रदेश नामावलीमा अझै किचलो छ । बल्लतल्ल प्रदेश कमिटि सदस्यको नामावली जुटाए पनि आन्तरिक विवाद कायमै छ । प्रम ओली र कार्यकारी अध्यक्ष पुष्पकमल दाहाल प्रचण्डको अलग–अलग राजनैतिक प्रस्तावका कारण पछिल्लो क्रममा नेकपामा भुईचालो जाने देखिए पछि ओली निकट नेताहरुले प्रचण्डलाई भेटेर सम्भावित दुर्घटना रोक्न विकल्प पहिल्याउन अनुरोध गरेका थिए । ओली निकटका नेताहरुको कुरा सुनिसकेपछि जवाफमा प्रचण्डले भने– प्रम ओलीको अहम्ता, पार्टीका हरेक निर्णयलाई चुनौती दिने जस्ता कार्यले नेकपामा यस्तो अवस्था आएको बताउँदै अहिले जुनस्तरको संकट देखिएको छ त्यो प्रधानमन्त्रीको अहम्ताकै कारण सिर्जना भएको हो । त्यसैले अहिलेसम्म जेजस्ता र जति समस्याहरु पार्टीमा देखिएका छन् त्यसलाई सम्बोधन गरेर पार्टी एकता मजबुत पार्न प्रम ओलीनै सबैभन्दा बढी जिम्मेवार हुनुहुन्छ भन्ने प्रचण्डको भनाइरहेको थियो ।
स्मरणीय छ कार्यकारी अध्यक्ष प्रचण्डले सचिवालयका बहुमत सदस्यहरुका समर्थनमा कार्तिक अन्तिम साता पार्टीमा राजनैतिक प्रस्ताव पेश गर्दै कोभिड–१९ को नियन्त्रणका लागि स्वास्थ्य सामाग्री खरिदमा भएको अनियमितता, यति होल्डिङस्् कम्पनीसँग सरकारको साठगाठ लगायत अन्य भ्रष्टाचार जन्य क्रियाकलापको छानबिनको माग गर्दै प्रम ओलीले मुलुकका लागि त्याग गर्नुपर्ने बेला आएको भन्दै घुमाउरो पारामा प्रमको राजिनामाको माग उनले गरेका थिए ।
यता ओलीले भने कार्यकारी अध्यक्ष प्रचण्डको उक्त प्रस्तावलाई ‘अभियोग पत्र’को संज्ञा दिदै १० दिनपछि बस्ने सचिवालय बैठकमा बेग्लै प्रतिवेदनमार्फत ‘इट्टाको जवाफ पत्थरले दिने’ बताउँदै प्रम ओली यदी प्रचण्डले राखेका अथवा लगाएका अभियोग साच्चिकै सही ठहरीएमा आफुले दुवै पदबाट राजिनामा दिने र यदी आफुमाथि लगाइएको उक्त अभियोग झुट्टा ठहरिएमा प्रचण्डले पनि कार्यकारी अध्यक्षको जिम्मेवारीलाई तिलाञ्जली दिनुपर्ने हाँक ओलीले दिएका छन् ।

प्रतिक्रिया दिनुहोस

सम्बन्धित समाचार